“F-4 UAE Championship”да ўзбекистонлик пилот ўз натижасини яхшиламоқда + ФОТО

Ушбу нуфузли мусобақада илк маротаба ҳамюртимиз, Ўзбекистон Миллий автомобил клуби (ЎзМАК) аъзоси Исмоил Аҳмадхўжаев ҳам иштирок этяпти ва аҳамиятлиси, ҳозирча дебютант пилотимизнинг натижалари чакки бўлмаяпти. Таъкидлаш керак, мазкур мусобақа бир нечта босқичда ўтказилади.

Мусобақанинг илк босқичида ҳамюртимиз марра чизиғини 23-ўринда кесиб ўтди. Бир қатор пойгачилар маррага етиб келишолмагани ва Исмоил Аҳмадхўжаев учун бу илк мусобақа бўлганлигини инобатга олсак, натижа ёмон эмаслиги ойдинлашади. Боз устига, дебют мусобақасида ҳар қандай спортчида кучли ҳаяжон бўлади ва спортчи энг аввало рақиб билан эмас, ўзидаги ҳаяжон билан курашиши, ҳаяжонини енгиб ўтиши талаб қилинади.

Мусобақанинг иккинчи ва учинчи босқичларида ҳамюртимиз ўз натижасини сезиларли даражада яхшилаб, маррага 19-ўринда етиб келди. Ўз натижасини бирйўла 4та поғонага ошириш дебютант пилот учун чакки кўрсаткич эмас.

Бугун “F-4 UAE Championship” халқаро турнирининг тўртинчи босқичи ўтказилмоқда ва шу билан биринчи раунд ўз якунига етади. “F-4 UAE Championship”пойгаси Абу-Дабидаги “Яс Марина Cирcуит” трассасида бўлиб ўтмоқда. Ушбу трассада Формула-1 пойгалари ҳам ўтказилишини автопойга ихлосмандлари яхши билишади.

Энг юқори хавфсизлик стандартларига риоя қилинган ҳолда ҳамда харажатларни меъёр даражасида ушлаб туриш орқали ташкил этилаётган “F-4 UAE Championship” мусобақаси ёш пойгачиларга халқаро миқёсда тан олинган трассаларда ўз маҳоратларини ошириш ва формула тоифаларида ўз фаолиятини бошлаш учун етарли вақт давомида машқ қилиш учун идеал платформадир.

Умид қиламизки, ушбу мусобақа ҳамюртимиз учун келажакда Формула-4 нинг Италия ёки Британиядаги босқичлари, қолаверса Формула-3, Формула-2 ва ниҳоят Формула-1 пойгалари учун трамплин вазифасини ўтаб беради.