Фабио Каннаваро нега айнан Атлантани танлади?

"ЖЧда 48 жамоа қатнашади. ФИФА уларни меҳмонхона ва машғулот майдони билан таъминлаши керак. Жамоалар учун энг асосий нарса шу. Меҳмонхонаси ва машғулот майдони бўлса бўлди. 

48 жамоа учун ФИФА 64 та машғулот майдони ва 64 та меҳмонхона таклиф қилди. Яъни меҳмонхона билан машғулот майдони бир-бирига боғланган. Меҳмонхонани танласангиз, ўшанинг машғулот майдони ҳам бор. ФИФА 64 вариантни ўтган йилнинг бошида эълон қилган эди ва сайтига қўйиб: "Ўрганиб чиқинглар", деган. 

Жамоалар ўрганиб чиқишди, ҳатто бориб кўриб ҳам келишди. Кейин қуръани кутишди.

Шу 64 нинг ичидан ҳар битта жамоага 5 та вариант берилди. Жамоалар ўзининг хоҳишига қараб: "Биринчи вариантим — бу, иккинчи вариантим — бу, учинчи вариантим — бу", белгилашган. Кейин ФИФА ўрганиб чиқиб: "Мана шу сизларнинг якуний танловинглар", деб қарор берган. 

Иложи борича, ҳаммага биринчи вариантини берган, лекин тўқнаш келиб қоладиган бўлса, жамоаларнинг рейтингига қаралган. Масалан, Ўзбекистон Атлантани танлади. Айтайлик, Германия ҳам: "Атлантада тураман", деб танлаган бўлса, ФИФА ҳужжатларни ўрганади ва Германиянинг рейтинги баланд бўлганлиги учун, немисларга устуворлик беради. Шунда Ўзбекистон иккинчи вариантга ўтишга мажбур бўлади. Шу қоида бўйича жамоалар танлаб-танлаб, ажратиб-ажратиб, жамоаларга меҳмонхоналар ажратилган.

Мусобақа бўлиб ўтадиган шаҳарлар суратдаги учта доирага бўлинган. Оқ теглар ва қизилдагилари — мезбон шаҳарлар. Ўзбекистон ўртадаги марказий доиранинг ичида. Шунинг учун марказий доиранинг ичидаги жойлардан биттасини танлаган. Яъни у чеккадан — Сиэтлдан ёки Бостондан танласа бўлмас эди, унақа вариант берилмас эди. Мана шу марказий доиранинг ичидаги меҳмонхона танлаган.

Ўзбекистоннинг ўйинлари Ҳьюстон, Атланта ва Мехикода бўлади. Учаласи ҳам шу марказий доиранинг ичида. Атланта — Ўзбекистон ўзига база қилиб танлаб олган жой. Мусобақа охиригача жамоамиз шу жойда истиқомат қилади", – дейилади хабарда.