“Фарғона Челленжер”. Бугун Файзиев ва Фомин кортга чиқади

Соврин жамғармаси 75 000 АҚШ долларини ташкил қилувчи мусобақада нимчорак финал учрашувлари ўтказилмоқда. Бугун икки нафар теннисчимиз чорак финал чиптаси учун кортга чиқади.

Биринчи ракеткамиз Санжар Файзиев нимчорак финалда сербиялик Никола Милоевич билан ҳисоб-китоб қилади. Файзиев дунё рейтингида 262, Милоевич эса 211-ўринни эгаллаб турибди. Бу икки теннисчи ўзаро бир бор тўқнаш келишган. 2015 йил Қаршида ўтган учрашувда Никола ғалаба қозонган.

Яна бир теннисчимиз Сергей Фомин эса канадалик Брейден Шнур билан муносабатларига ойдинлик киритиб олади. Фомин дунё рейтинигда 1600, Шнур эса 244-ўринни банд этган.

Эслатиб ўтамиз, кеча ўтказилган биринчи давра учрашувида ҳамюртларимиздан Темур Исмоилов исроиллик Эдан Лешемга, Амал Султонбеков қозоғистонлик Тимур Хабибулинга, Азизхон Турғунов эса туркиялик Жем Илкелга имкониятни бой берган эди.