Фарғона вилояти дзюдосига янги раҳбар сайланди

Бугунги кунда Фарғона вилояти дзюдосини янги босқичга кўтариш, олиб борилаётган кенг қамровдаги ислоҳотларни амалга оширишда талабчан, иш кўзини биладиган бошқарувчи-мутахассисга эҳтиёж сезилаётган эди. Ана шу кемтикни беркитиш мақсадида вилоят дзюдоси раҳбарлигига муносиб номзод илгари сурилди.

Ўзбекистон дзюдо федерациясида ZOOM платформаси орқали ўтказилган йиғилишда номзод расман таништирилди. Иштирокчилар Мамажонов Файзулло Абдусаматович номзодини ўз овозлари билан тасдиқлаб беришди. Шу йил 40 ёшини қарши олган Файзулло Мамажонов тадбиркорлик билан шуғулланади. "Great Silk Road Service" цемент заводи бош директори лавозимида фаолият юритиб келмоқда. 

Маълумоти олий. Тошкент давлат Иқтисодиёт университети (2005), Тошкент давлат Юридик университетида (2009) бакалавр, Тошкент давлат Иқтисодиёт университетида (2012) магистр даражасини олган. 

Йиғилиш сўнггида Ўзбекистон дзюдо федерацияси раиси ўринбосари Зафар Қаҳрамонов масъулиятли вазифага киришаётган Файзулло Мамажоновга омад тилаб, унга катта ишонч билдирилаётганини маълум қилди.