Фарғона вилоятида ҳам оммавий спорт тадбирларига эътибор кучайган

Жумладан, дам олиш кунлари Данғара туманида ИИБнинг туман бўлими, Жисмоний тарбия ва спорт бўлими ҳамда тумандаги “Арзиктепа” маҳалла фуқаролар йиғини билан ҳамкорликда “Спортни сев, спорт билан яша!” шиори остида 4-сектордаги уюшмаган ёшлар, фахрийлар ва болажонлар ўртасида уч авлод вакиллари иштирокида шахмат ва стол тенниси мусобақалари ташкил этилди.

Шунингдек, Данғара тумани жисмоний тарбия ва спорт бўлими ташаббуси 3-секторда мини-футбол бўйича “Ҳоким кубоги” мусобақасига старт берилди. Мусобақада 14 та маҳалладан 18-30 ёшгача бўлган уюшмаган ёшлар иштирок этишмоқда.

Вилоятнинг Сўх туманида ҳам жисмоний тарбия ва спорт соҳасини ривожлантириш, айниқса, футболни оммалаштириш мақсадида туман ички ишлар бўлими ташаббуси билан секторлар кесимида мини-футбол бўйича мусобақаларга старт берилди.

Айни кунда секторлар кесимида мусобақаларнинг саралаш босқичи қизғин давом этмоқда. Секторлар кесимида финалга чиққан жамоалар ғолибликни қўлга киритиш учун туман марказидаги “Сўғдиёна” спорт мажмуасида майдонга чиқишади.

Шунингдек, туман мактабларида ҳам спортни ривожлантиришга қаратилган турли тадбирлар ташкил этилаётир. Жумладан, туман жисмоний тарбия ва спорт бўлими ташаббуси билан 23-сонли умуми ўрта таълим мактаби ўқувчиларига спорт анжомлари – волейбол ва футбол тўплари совға қилинди.