Фарғонада белбоғли кураш бўйича Жаҳон ва Осиё чемпионати ўтказиляпти

Шу боис кеча, 9 июнь куни чемпионат олдидан оммавий ахборот воситалари ходимлари, блогерлар ва спорт жамоатчилиги иштирокида матбуот анжумани ташкил этилди. 

Унда Ўзбекистон белбоғли кураш федерацияси раиси Равшан Дастиров, Фарғона вилояти спорт бошқармаси бошлиғи Нодирбек Ҳакимов, катталар миллий терма жамоаси бош мураббийи Шавкат Мирзақулов ва ёшлар терма жамоаси бош мураббийи Бахтиёр Турғунпўлатов иштирок этиб, мусобақаларнинг ташкилий жиҳатлари ҳамда кутилаётган натижалар ҳақида батафсил маълумот бердишди.

Ўзбекистон Республикаси спорт вазирлиги, Халқаро белбоғли кураш ассоциацияси, Фарғона вилояти ҳокимлиги, Осиё белбоғли кураш конфедрацияси, Фарғона вилоят спорт бошқармаси ҳамда қатор вазирлик ва ташкилотлар Ўзбекистон белбоғли кураш федерацияси билан ҳамкорликда ўтказаётган ушбу Жаҳон ва Осиё чемпионатида Ҳиндистон, Индонизия, Туркия, Латвия, Россия, Миср, Мўғулистон, Польша, қўшни Қозоғистон, Қирғиз Республикаси, Тожикистон, Туркманистон каби 30 га яқин давлатнинг номдор полвонлари иштирок этмоқда. 

Регламентга кўра, 10-11 июнь кунлари ўсмирлар ва қизлар ўртасида ( U17) жаҳон чемпионати ўтказилса, 13-14 июнь кунлари белбоғли кураш бўйича катталар ўртасида Осиё чемпионати беллашувлари бўлиб ўтади.

Илҳом РАҲМОНОВ тайёрлади