Фарғонадаги спорт муассасаларининг фаолияти ўрганилди

Расмийлар вилоятидаги спорт таълим муассасаларига бориб, федерацияларнинг ҳудудий вакиллари билан суҳбатлашди. Мутасаддиларга вилоят ҳокими Хайрулла Бозоров ҳамроҳлик қилди.

Дастлабки манзил Фарғона Олимпия ва Паралимпия спорт турларига тайёрлаш маркази бўлди. Марказ мутасаддилари ишчи гуруҳга муассасанинг имкониятлари, фаолияти ва ўқувчиларга яратилган шарт-шароитлар ҳақида умумий маълумот беришди. Ташриф давомида машғулотлар жараёни ва марказ ҳудуди кўздан кечирилиб, қатор масалалар бўйича фикр алмашилди.

Шунингдек, Фарғона тумани ва шаҳридаги 1-сон спорт мактаблари ҳамда Марғилон шаҳридаги спорт мактабининг фаолияти ўрганилди. Ҳудудлардаги ёшларнинг қайси спорт турига кўпроқ қизиқиш билдиришаётганидан келиб чиққан ҳолда машғулотлар жадвалини шакллантириш, мактаблардаги мураббийларнинг малакасини ошириш, моддий-техник базасини янада кучайтириш бўйича тавсиялар берилди.

Вилоятнинг 2025 йил ва янги Олимпия цикли учун тайёргарлик режалари мавзусига бағишланган йиғилиши Фарғона шаҳар 1-сон спорт мактабида ўтди. Унда вилоят ҳокимлиги масъуллари, соҳа мутахассислари, федерацияларнинг вилоят бўлими вакиллари билан белгиланган устувор вазифалар, хусусан, Лазизбек Мулложонов ҳамда Асадхўжа Мўйдинхўжаев каби Олимпиада чемпионларини тарбиялаш, келгуси Олимпия ўйинларига йўлланма олиши мумкин бўлган фарғоналик спортчиларнинг шуғулланишлари учун барча шароитларни яратиш каби йўналишлар белгилаб олинди.