FEI Jumping Children`s Classic Final-2019. Бош соврин Ўзбекистонда қолди

Йирик халқаро мусобақада сайёрамизнинг беш қитъасидаги 12 давлатдан йиғилган энг иқтидорли чавандозлар ғолиблик учун баҳс олиб борди. Мусобақа нуфузи ҳам жуда юқори, уни бемалол жаҳон чемпионати билан қиёслаш мумкин.

Негаки “Аллюр” от спорти клубида кечган қизиқарли беллашувларда оддий спортчилар эмас, балки ўз минтақасида ном қозонган, қайсики саралаш босқичидан муваффақиятли ўтган энг иқтидорли чавандозлар иштирок этди. 

Мусобақанинг сўнгги кунида иштирокчилар баландлиги 1 метру 10 сантиметр бўлган тўсиқлардан сакраш бўйича ўзаро баҳслашди. Шуниси эътиборлики, илк уринишда бирйўла 10 (!) нафар ёш чавандоз деярли бир хил натижани қайд этди ва ғолибни аниқлаш учун яна қайта сакрашига тўғри келди. 

Ана шу 10та омадли чавандоз сафидан ўзбекистонлик спортчиларнинг барчаси ўрин олишгани ҳам таҳсинга лойиқ.

Иккинчи уринишда ҳамюртимиз Ли София энг паст натижа кўрсатган бўлса, яна бир вакилимиз Абдураҳмон Абдуллаев 5-ўринни қўлга киритди. Зокир Тўражонов ўзининг Чарльз Терон лақабли отида белгиланган масофани атиги 35 сонияда ва бехато босиб ўтди. Бу натижа уни мусобақа пешқадамига айлантирганди.

Аммо Зокирнинг қувончи узоққа чўзилмади, орадан кўп ўтмай яна бир вакилимиз Мирёқуб Исмоилов Лэди лақабли оти билан унданда яхшироқ натижа кўрсатди. Кўпчилик “FEI Jumping Children`s Classic Final-2019” мусобақасининг олтин ва кумуш медаллари мезбонларга насиб этишини тахмин қилиб турган бир паллада иккинчи босқичнинг сўнгги вакили россиялик Дарья Кукушкина Кардинал лақабли тулпорида ажойиб чиқиши билан Мирёқубдан атиги 0,01 сонияга ортда қолган ҳолда якунда иккала ўзбекистонлик чавандоз орасидан жой олди.

Шу тариқа “FEI Jumping Children`s Classic Final-2019” мусобақасида ҳамюртларимиз олтин ҳамда бронза медалига сазовор бўлди. Дарья Кукушкина эса ўзининг дастлабки халқаро мусобақасида ажойиб натижа қайд этди. У дастлабки кунги мусобақаларда олтин, шанба куни эса бронза медалини қўлга киритган эди. Кеча эса унинг медаллар қоллекцияси кумуш билан бойиди.

Мусобақанинг ёпилиш маросимида ғолиб ва совриндорлар ташкилотчилар томонидан медал ва эсталик совғалари билан тақдирланди.