FEI Jumping Children`s Classic Final-2019. Бошланишига иккита медал!

Нуфузли мусобақада дунёнинг 12та давлатидан ёш ва иқтидорли чавандозлар ғолиблик учун баҳсларга киришди.

“FEI Jumping Children`s Classic Final-2019” мусобақаси от спорти бўйича 15 ёшгача бўлган чавандозлар ўртасидаги энг нуфузли турнирлардан бири саналади ва бундай йирик спорт анжумани Осиё қитъасида ҳали ўтказилмаган эди. Халқаро от спорти федерацияси томонидан ушбу нуфузли мусобақани Ўзбекистонга ишониб топширилиши – бу юртимизда от спортига берилаётган эътиборнинг юксак эътирофидир.

Кечаги мусобақаларда беш қитъадан келган 19 нафар чавандоз баҳсларга киришди. Халқаро болалар кубогининг илк кунида иштирокчилар белгиланган масофани тез ва бехато босиб ўтиш бўйича ўзаро рақобатлашди. Унда россиялик Дарья Кукушкина Кардинал лақабли оти билан энг яхши натижа қайд этиб, 1-ўринга сазовор бўлди.

Қувонарлиси, мусобақанинг дастлабки кунида юртимиз чавандозлари ҳам совринли ўринларни қўлга киритишди. Терма жамоамиз аъзоси Зокир Тўражонов ўзининг Чарльз Терон лақабли оти билан иккинчи яхши натижани қайд этди. Яна бир вакилимиз Мирёқуб Исмолилов эса Леди лақабли тулпори билан 3-ўринни эгаллади.