16 янв 07:43
Янгиликлар
FIA Абу-Даби Гран-приси бўйича расман текширув бошлади
FIA Жаҳон кенгашининг 2021 йил 15 декабрдаги йиғилишида қабул қилинган қарорга мувофиқ, FIA маъмурияти Муҳаммад бин Сулайем бошчилигида якуний Абу Даби Гран-приси воқеаларини батафсил таҳлил қилишни бошлади.
FIA президенти барча Формула-1 жамоалари билан бир қатор масалаларни, шу жумладан, ушбу масалани ҳам муҳокама қилади.
19 январь куни бўлиб ўтадиган йиғилишда хавфсизлик автомобилидан фойдаланиш бўйича текширув қўмитанинг кун тартибига киритилади. Кейинги қадам бу масалани барча Формула-1 ҳайдовчилари билан биргаликда муҳокама қилиш бўлади.
Батафсил таҳлил натижалари февраль ойида Формула-1 комиссиясига тақдим этилади ва бу борадаги якуний қарор FIA Жаҳон кенгашининг 18 март куни Баҳрайнда бўлиб ўтадиган йиғилишида эълон қилинади.
Эслатиб ўтамиз, 12 декабрь куни Абу-Дабида Формула-1 навбатдаги мавсумининг сўнгги пойгаси бўлиб ўтганди. "Мерседес" вакили Льюис Хэмилтон ва "Ред Булл" пилоти Макс Ферстаппен босқич олдидан бир хил очко жамғаришганди. Голландиялик пойгачи сўнгги айланада Хэмилтондан ўзиб кетган ва фаолиятида илк бор чемпионликни қўлга киритган эди.
"Мерседес" жамоаси иккита ҳолат юзасидан ўз норозилигини билдирган, бироқ стюардлар уларни рад этишган эди. Эътирозлардан бири Safety Car режимидан сўнг қайта старт тартибининг бузилиши билан боғлиқ.
Фикрлар