ФИДЕ Жаҳон Кубоги. Қизларимиз илк босқичдаёқ юришларини тўхтатишди

Афсуски, қизларимиз умумий мукофот жамғармаси 676 250 долларни ташкил этувчи ҳамда дунёнинг 103 нафар кучли шахматчилари дона сураётган мусобақанинг 1/64 финал босқичидаёқ икки партия якунига кўра мағлубиятга учраб, Жаҳон Кубогидаги иштирокларини муддатидан анча аввал якунлашди. 

Нилуфар Ёқуббоева ҳамда Умида Омонова биринчи давранинг илк баҳсида рақибалари билан дурангга эришишганди. Иккинчи партияда Ёқуббоева перулик Дейси Кори Телиога, Омонова эса ўзидан рейтинги анча юқори бўлган Мўғулистон терма жамоаси аъзоси Батхи Монгонтуулга имкониятни бой бериб қўйди. 

Ўзбекистон аёллар шахматидаги "можаро" ўз "меваси"ни бериб улгурди. Ўшанда ҳукумат расмийлари иштирокида йиғилиш ўтказилиб, ҳатто АҚШ шарафини ҳимоя қила бошлаган гроссмейстеримиз Гулруҳбегим Тоҳиржонова ҳам ортга қайтарилиши айтилганди.