ФИДЕ Жаҳон кубоги. Йигитларимиз тўлиқ таркибда 1/64 финалга чиқишди

Дунёнинг энг кучли шахматчиси Магнус Карлсен ҳам иштирок этаётган мусобақанинг умумий мукофот жамғармаси 1 892 500 долларни ташкил қилади. Ғолиб якунда 110 000 долларга эга бўлади. Биринчи босқич - 1/128 финалда 156 нафар иштирокчи баҳсларга киришди. Иккинчи босқич - 1/64 финалдан эса рейтинги юқори бўлган 50 гроссмейстер курашга қўшилади. 

Қувонарлиси, Жаҳонгир Воҳидов, Шамсиддин Воҳидов, Нодирбек Ёқуббоев, Жавоҳир Синдаров ва Нодирбек Абдусатторовдан иборат Ўзбекистон эркаклар терма жамоасининг бари илк босқичда (2 партия) умумий ғалабага эришиб, 1/64 финалга йўл олишди. 

Дунё тарихидаги иккинчи ёш гроссмейтер мақомини олган Нодирбек Абдусатторов индонезиялик рақиби Муҳаммад Эрван Сочига келмагани боис, курашсиз иккинчи босқичга йўлланмани қўлга киритди. Ўсмирлар ўртасида жаҳон чемпиони Жавоҳир Синдаров АҚШ вакили Танг Эндрюни 1,5:0,5, Жаҳонгир Воҳидов грузиялик Леван Пантсулаяни 1,5:0,5, Нодирбек Ёқуббоев канадалик Разван Преотуни 1,5:0,5, Шамсиддин Воҳидов грузиялик Лука Пайчадзени 2:0 ҳисобида мағлубиятга учратди.   

Мусобақа регламентига кўра, шахматчилар ҳар бир босқичда иккитадан учрашув ўтказишади. Дуранг бўлиб қолган тақдирда қўшимча учинчи партия -тай-брекка мурожаат қилинади. Унда ҳам томонлар муросага келишса, у ҳолда вақт чегарасига асосланган тезкор шахматда ғолиб аниқланади.