ФИФА президенти Инфантино ЖЧ-2026 шаънига айтилган танқидларга жавоб қайтарди

Ажойиб ўйинимизни, ҳис-туйғуларни, байрамларни, кўз ёш тўкиш ва қувончли лаҳзаларни ўтказиб юборганларнинг барчасига мурожаат қиламан. Футбол атрофида болалар, гўдаклар, ота-оналар, бобо ва бувилар бирлашганини ўтказиб юборганларнинг барчасига. Ўйинлар якунлангани учун, бутун ушбу қувонч ва жипсликни ўтказиб юборганингиз учун узр сўрайман. Нафрат ва танқидга шунчалик берилиб кетганингиз сабаб буларнинг барини ўтказиб юборганингиз учун кечирим сўрайман.

Қалам ва қоғозлари, экранлари қаршисида ўтириб, нафрат ва ёлғон миш-мишларни тарқатаётганларга айтмоқчиман: сиз четда ўтирган бир пайтда, биз ФИФАда энг олдинги сафдамиз, ташкиллаштирмоқдамиз, жон куйдириб меҳнат қилмоқдамиз ва дунёдаги энг яхши шоуни ўтказмоқдамиз. Сиз яширинган бир пайтда, биз Канада, Мексика ва Қўшма Штатлар кўчаларини кезиб, мухлислар билан мулоқот қилмоқдамиз, одамлар билан алоқа ўрнатмоқдамиз ва ҳар бир инсоннинг хавфсизлигини таъминламоқдамиз. Сиз бўлаётган бир пайтда, биз бирлаштирмоқдамиз. Одамлар оилалари билан, мухлис сифатида, ягона бир бутунлик сифатида жипслашдилар.

Ушбу жаҳон чемпионати инсониятнинг энг яхши фазилатларини улуғлади. Биз кичик мамлакатлар терма жамоалари энг нуфузли ўйинларда фахр билан ўйнаганига гувоҳ бўлдик. Улар ўзларига ишонган ҳолда, профессионаллардек ҳаракат қилишди ва ўз мамлакатларини фахрланишга мажбур этдилар. Энг муҳими — улар қаердан бўлишидан қатъи назар, ҳар бир инсон дунёнинг бир қисми бўлиши ва ўйинда муваффақиятга эришиши мумкинлигига умид бағишлашди. Биз ҳаммамиз тенгмиз — мухлислар ҳам, ўйинчилар ҳам, шунчаки одамлар ҳам. Биз ФИФАда ушбу севги, қувонч ва бирдамлик лаҳзаларини кузатиб, чексиз фахр ва ҳаяжонни ҳис этмоқдамиз.

Бизга нафрат сочиш учун ўз вақти ва кучини сарфлаётганлар, илтимос, бир дақиқа хаёлга толинг, медитация қилинг, дуо қилинг ёки шунчаки ўйинни томоша қилиб, инсонларнинг юзларига, кўзларига, ҳис-туйғуларига боқинг. Чунки фақатгина бизнинг ажойиб ўйинимиз ҳамма бир бутун бўладиган ва қайта бирлашадиган бундай фавқулодда шоуни ярата олиши мумкин.

Ниҳоят, мен ФИФА президенти сифатида, кичик бўлса-да, ушбу шоуга ўз ҳиссамни қўшганимдан чексиз фахрланаман. Бу жуда ажойиб туйғу! Барчага катта муҳаббат билан", — дейилади Инфантинонинг ФИФА расмий сайтидаги мурожаатида.