Фомин "Президент кубоги"ида уччала сети тай-бреккача чўзилган уч ярим соатлик учрашув ўтказди

Ушбу турнирда мамлакатимизнинг иккинчи ракеткаси Сергей Фомин ҳам иштирок этаётган эди. Ҳамюртимиз илк даврада япониялик Юзуки Такеруни, иккинчи босқичда туркиялик Янки Эрелни мағлубиятга учратган эди. 

Афсуски, ҳозиргина якунига етган 1/4 финал баҳсида грузиялик Александр Бакшига имкониятни бой бериб қўйди. Уч соату 23 дақиқа давом этган учрашувнинг уччала сети ҳам тай-бреккача чўзилди. Тай-брекларнинг биттасида Фомин, иккитасида Бакши ғалаба қозонди - 6/7(5), 7/6(3), 6/7(3). 

Таққослаш учун, Сергей Фомин ATP рейтингида 582, турнирнинг олтинчи ракеткаси сифатида ҳаракат қилган Эрел 448, Бакши эса 622-поғонадан жой олган. Бу Фомин ва Бакши ўзаро иккинчи учрашувларини ўтказишди. 2022 йилда ўтган илк тўқнашувда ҳам грузиялик теннисчи зафар қучган эди.