Формула-1. "Альпин" жамоаси 2022 йилги мавсум учун янги болидини намойиш этди

2022 йилги мавсумдан бошлаб Формула-1да янги техник регламент амал қилади, шу туфайли автомобилларнинг ташқи кўриниши, шунингдек, техник хусусиятлари кескин ўзгаради.

Ўтган йили "Альпин" конструкторлар чемпионатида бешинчи ўринни эгаллаган эди. Жамоа шарафини испаниялик Фернандо Алонсо ва франциялик Эстебан Окон ҳимоя қилишган, 2022 йилги мавсумда ҳайдовчилар таркиби ўзгармайди.

Шу тариқа, фақат битта жамоа ҳали янги мавсум учун автомобилини намойиш этмади. Бу - "Альфа Ромео" жамоаси. Уларнинг тақдимоти Баҳрайндаги мавсумолди илк синов пойгалари якунланганидан кейин 27 февралда ўтказилиши белгиланган.

Эслатиб ўтамиз, биринчи мавсумолди синовлари 23-25   февраль кунлари Барселонада (Испания) бўлиб ўтади. Иккинчи йиғин 10-12 март кунларига мўлжалланган ва Баҳрайнда бўлиб ўтади. Шундан сўнг, у ерда янги мавсумнинг биринчи босқичи бўлиб ўтади.