ФОТО Исроил Мадримов матбуот анжуманида нималар деди?

Биз учун аҳамиятлиси, унинг доирасида чарм қўлқоп усталаримиз Исроил Мадримов ва Шаҳрам Ғиёсов ўзларининг навбатдаги жангларини ўтказишади. Бугун оқшом иштирокчилари матбуот анжуманида қатнашишди. 

Жумладан, Исроил Мадримов (5-0, 5 KOs) ва унинг рақиби Эрик Уолкер (20-2, 9 KOs) ҳам саволларга жавоб беришди. Биз учун Исроилнинг фикрлари муҳимроқ.

"Жангларимизни ташкил этишда жонбозлик кўрсатаётган таниқли промоутер Эдди Хирнга миннатдорчилик билдираман. Муроджон Аҳмадалиевнинг чемпион бўлишида ҳам бу инсоннинг хиссаси катта. Унинг режасида барчамизнинг чемпионлик жангларимизни Ўзбекистонда ўтказиш ҳам бор эди. Афсуски, пандемик вазият бунга йўл қўймади", - деди Мадримов.  

"Ўзбекистонда боксни ақлбовар қилмас даражада яхши кўришади. Ҳукумат ҳам барча спорт турлари қатори боксни қўллаб-қувватлайди. Натижалар эса шунга монанд бўлмоқда. Яна бир бор Муроджонни эсга оламан. У қисқа муддатда иккита чемпионлик камарини қўлга киритди. Дўстимиз, жамоадошимиз учун ўзимизда йўқ хурсандмиз. Менда ҳам ана шу рекордни янгилаш имконияти бор. Бунинг учун биринчи галда эртага ўтказиладиган саралаш жангида ғалаба қозонишим шарт", - дея сўзларини давом эттирди чарм қўлқоп устамиз. 

"Чемпионлик жангидаги рақибим Жейсон Росариоми бўладими ёки Жермалл Чарломи, менга фарқи йўқ. Исталган чемпионга қарши рингга чиқишга тайёрман. Улар мендан қочиб қутула олмайдилар. Мен дебют жангимдаёқ камар учун рингга чиққанман. Бундан кейинги жангларим ҳам титул учун бўлади", - дея сўзларига якун ясади Исроил.