Freestyle Chess Challenge. Абдусатторов 1/2 финалда, эндиги рақиб Магнус Карлсен!

Дунёнинг кучли саккиз нафар гроссмейстери дона сураётган Фишер шахмати бўйича мусобақада ҳамюртимиз Нодирбек Абдусатторов (2744) ҳам муваффақиятли одимлаяпти. Кеча 1/4 финал босқичнинг жавоб учрашувлари ўтказилди. Саралаш босқичини ғолиб сифатида якунлаган Абдусатторов 1/4 финалда хитойлик Дин Лижэнь (Хитой, 2762) устидан ҳам зафар қучди. Биринчи партияда Нодирбекнинг ғалабаси қайд этилганди. Иккинчи учрашувда гроссмейтеримиз қора доналарда дуранг ўйнади. 

Чорак финалнинг битта жуфтлигида ғолиб тай-брекда аниқланди. Унда рапид ва блиц шахматда амалдаги жаҳон чемпиони Магнус Карлсен (Норвегия, 2830) франциялик Алиреза Фирузджа (2760)дан устун келди. Энди 1/2 финалда яна бир бор Нодирбек Абдусатторов - Магнус Карлсен қарама-қаршилигига гувоҳ бўламиз.    

Эслатиб ўтамиз, шахматчимиз саралаш босқичининг сўнгги 7-турида Карлсенни мағлубиятга учратиб, плей-оффга 1-ўрин билан йўл олганди. Ярим финал учрашувлари бугун ва эртага ўтказилади. Шахматчилар ўзаро иккита партия ўйнашади. Жами 40 та юришга 90 дақиқадан вақт берилади. Икки партияда ғолиб аниқланмаган тақдирда тай-брекка мурожаат қилинади. Плей-оффнинг барча босқич учрашувлари бизнинг вақт билан соат 17:00да бошланади.

1/4 финал натижалари 

Алиреза Фирузджа (Франция, 2760) - Магнус Карлсен (Норвегия, 2830) 1-1 (1-0, 0-1). Тай-брейк - 0-2

Фабиано Каруана (АҚШ, 2804) - Доммараджу Гукеш (Ҳиндистон, 2743) 1.5-0.5 (1-0, 1/2)

Нодирбек Абдусатторов (Ўзбекистон, 2744) - Дин Лижэнь (Хитой, 2762) 1.5-0.5 (1-0, 1/2)

Винсент Каймер (Германия, 2738) - Левон Аронян (АҚШ, 2725) 0.5-1.5 (1/2, 0-1)

1/2 финал жуфтликлари (13-14 февраль):

Нодирбек Абдусатторов (Ўзбекистон, 2744) - Магнус Карлсен (Норвегия, 2830)

Фабиано Каруана (АҚШ, 2804) - Левон Аронян (АҚШ, 2725)

5-8 ўринлар учун баҳс

Алиреза Фирузджа - Дин Лижэнь

Винсент Каймер - Доммараджу Гукеш

Финал: 15-16 февраль