Freestyle Chess Challenge. Абдусатторов 4-ўринни олган турнирда ғолиб ва совриндорлар маълум

Дунёнинг кучли саккиз нафар гроссмейстери дона сурган Фишер шахмати бўйича мусобақада ҳамюртимиз Нодирбек Абдусатторов (2744) ҳам иштирок этди ва якунда 4-ўринни эгаллади. Кеча ҳал қилувчи плей-офф босқичининг икккинчи партиялари ўйналди. 

Саралаш босқичини ғолиб сифатида якунлаган Абдусатторов 3-ўрин соҳибини аниқлаб берган баҳсда америкалик Левон Аронянга 0,5:1,5 ҳисобида имкониятни бой бериб қўйди. Гроссмейстерлар биринчи партияда муросага келишганди, жавоб учрашувида тажрибали Ароняннинг қўли баланд келди.

Мусобақа бош соврини рапид ва блиц шахматда амалдаги жаҳон чемпиони Магнус Карлсен (Норвегия, 2830)га насиб этди. У финалда америкалик Фабиано Каруана (2804)ни 1,5:0,5 ҳисобида енгди. 

Плей-офф натижалари. Финал

Магнус Карлсен (Норвегия, 2830) - Фабиано Каруана (АҚШ, 2804) 1,5:0,5

3-ўрин учун баҳс

Нодирбек Абдусатторов - Левон Аронян (АҚШ, 2725) 0,5:1,5

5-6 ўринлар учун

Алиреза Фирузджа (Франция, 2760) - Доммараджу Гукеш (Ҳиндистон, 2743) 1,5:0,5

7-8 ўринлар учун

Винсент Каймер (Германия, 2738) - Дин Лижэнь (Хитой, 2762) 2:0