Freestyle Chess Grand Slam. Амалдаги жаҳон чемпиони Гукеш ҳам ютқазди, 1/4 финал натижалари ва 1/2 жуфтликлари + ФОТО

Қувонарлиси, кеча ўтказилган 1/4 финалда ёш гроссмейтеримиз Жавоҳир Синдаров жаҳон рейтингида 3-ўринни эгаллаб турган америкалик Ҳикару Накамурани қўшимча тай-брекда мағлубиятга учратди. Умумий 3:1 ҳисобидаги ғалаба Синдаровни Freestyle Chess Grand Slam турнирининг 1/2 финалга олиб чиқди. 

Накамура энди 1/4 финалда Нодирбек Абдусатторов сингари 5-ўрин учун курашни давом эттиради. Синдаров эса 1/2 финалда бошқа бир америкалик гроссмейстер, дунё рейтингида иккинчи ўринни эгаллаб турган Фабиано Каруанага қарши баҳс олиб боради. Фабиано 1/4 финалнинг ҳар икки учрашувида ҳам амалдаги жаҳон чемпиони ҳиндистонлик Гукеш Доммараджудан устун келди. 

Ярим финалнинг иккинчи жуфтлигида Магнус Карлсен Жавоҳир сингари турнир кашфиётига айланган германиялик Винсент Кеймер билан ҳисоб-китоб қилади. Кеймер 1/4 финалда жаҳон рейтингида 7-поғонадан жой олган франциялик Алиреза Фирузджани 1,5:0,5 ҳисобида енгди.    

Тўққизинчи ўрин соҳибини аниқлаб бераётган учрашувда плей-оффга чиқа олмаган икки гроссмейстер - арманистонлик Левон Аронян ҳамда словениялик Владимир Федосеев ўзаро ҳисоб-китоб қилди. Уларнинг илк партиясида Аронян оқ доналарда ғалаба қозонганди. Кечаги жавоб учрашувида дуранг натижа қайд этилди. Бугунги барча учрашувлар бизнинг вақт билан соат 17:00да бошланади.