Freestyle Chess Grand Slam. Бугун финал ҳамда бошқа ўринлар учун баҳслар бошланади

Бугун соврин жамғармаси 750 000 АҚШ долларини ташкил қилувчи мусобақада финал учрашувлари старт олади. Турнир бош соврини учун америкалик Фабиано Каруана мусобақа кашфиётига айланган германиялик Винсент Кеймерга қарши баҳс олиб боради. 

Кеймер 1/2 финалда норвегиялик афсона Магнус Карлсенни шов-шувли тарзда 1,5:0,5 ҳисобида мағлубиятга учратди. Дунё рейтингида иккинчи ўринда бораётган Каруана эса 7 та партия давом этган муросасиз курашда ҳамюртимиз Жавоҳир Синдаровдан 4:3 ҳисобида устун келди. 

Учинчи ўрин учун кечадиган қарама-қаршиликда Синдаров Магнус Карлсен билан ҳисоб-китоб қилади. Саралаш босқичидаги ўзаро учрашувда Жавоҳир номдор рақибини мағлубиятга учрата олганди. 

Чорак финалда айнан Магнусга енгилган Нодирбек Абдусатторов кеча франциялик Алиреза Фирузджани 1,5:0,5 ҳисобида мағлуб этди. Бугун у 5-ўрин учун кечадиган баҳсда америкалик Ҳикару Накамурага қарши ўйнайди. Рейтингнинг учинчи поғонасида бораётган Ҳикару кеча амалдаги жаҳон чемпиони ҳиндистонлик Гукеш Доммараджудан 2,5:1,5 ҳисобида устун келди. 

Бугун Гукеш ва Фирузджа 7-8 ўринлар учун ўзаро баҳс олиб боришади. 

Маълумот учун, финалнинг ҳал қилувчи иккинчи финал учрашуви эртага ўтказилади. Чемпион 200 000 долларни қўлга киритади. Синдаров 100 000, Абдусатторов эса 50 000 АҚШ доллари учун курашади. Бугунги учрашувлар ҳам бизнинг вақт билан соат 17:00да бошланади.