Freestyle Chess Grand Slam Finals. Синдаровнинг 1/2 финалдаги рақиби маълум

Жанубий Африка Республикасининг Кейптаун шаҳрида умумий мукофот жамғармаси 750 000 долларни ташкил этувчи якуний Freestyle Chess Champion 2025 турнирида 1/2 финал жуфтликлари аниқланди. Сайёрамизнинг саккиз нафар гроссмейстери иштирокида кечаётган нуфузли мусобақанинг икки 1/4 финал жуфтлигида ғолиблар қўшимча армагеддон партиясида аниқланди.  

Биз учун аҳамиятли чорак финал учрашувида норвегиялик шахмат афсонаси Магнус Карлсен ҳамда америкалик Фабиано Каруана ўзаро ҳисоб-китоб қилишди. Гроссмейстерлар биттадан партияда ғалаба қозонишди - 1:1. Ғолибни аниқлаш учун ўтказилган армагеддон партиясида Карлсен зафар қучди. 

Ярим финал учрашувлари эртага ўтказилади ва бизнинг вақт билан соат 16:00да бошланади. Унда Жавоҳир Синдаров Магнус Карлсенга қарши баҳс олиб боради. Финал олдидан финал бўлади. Ҳамюртимиз саралаш босқичининг илк туридаёқ Магнусни мағлуб этишга муваффақ бўлганди ва умид қиламизки, 1/2 финалда ҳам бу ҳолат такрорланади. 

Эслатиб ўтамиз, Жавоҳир Синдаров Freestyle Chess Grand Slam Finals турнирининг 1/4 финалида эронлик гроссмейстер Парҳам Мақсудлуни 2:0 ҳисобида мағлубиятга учратган эди.