Freestyle Chess Grand Slam. Жавоҳир Синдаров бугун Магнус Карлсенга қарши иккинчи ўйинини ўтказади

Соврин жамғармаси 750 000 АҚШ долларини ташкил қилувчи мусобақада ҳамюртимиз Жавоҳир Синдаров 3-ўрин учун кураш олиб бораётгани ҳақида хабар қилгандик. Ҳамюртимизга дунёнинг биринчи рақамли гроссмейстери Магнус Карлсен рақиблик қилмоқда. 

Кеча шахматчилар ўртасидаги биринчи партия бўлиб ўтди. Унда Жавоҳир Синдаров оқ доналарда ҳаракат қилиб, имкониятни бой бериб қўйганди. Бугун мазкур қарама-қаршиликнинг иккинчи партияси ўтказилади. 

Агар Жавоҳир ғалабага эришадиган бўлса, баҳс тай-бреккача чўзилади ва Синдаровда 3-ўрин учун имконият пайдо бўлади. Дуранг ёки мағлубият ҳамюртимиз турнирни 4-ўринда тугатишини таъминлайди. 

Шунингдек, Нодирбек Абдусатторов 5-ўрин учун дунё рейтингида учинчи ўринни эгаллаб турган Хикару Накамурага қарши баҳс олиб бормоқда. У ҳам кеча оқ доналарда тажрибали ўзидан 17 ёш катта рақибига имкониятни бой берганди.

Бош соврин учун кечаётган финалнинг дастлабки учрашувида яна кутилмаган натижа қайд этилди. Аллақачон турнир кашфиётига айланиб улгурган германиялик Винсент Кеймер дунёнинг иккинчи рақамли шахматчиси америкалик Фабиано Каруанани мағлубиятга учратди.