Freestyle Chess Grand Slam Paris. Нодирбек Абдусатторовдан муваффақиятли старт

Ёдингизда бўлса, Freestyle Chess Grand Slam мусобақасининг дастлабкиси февраль ойида Германияда ўтказилган ва унда Жавоҳир Синдаров 4, Нодирбек Абдусатторов 6-ўринни эгаллаганди. Ушбу турнирнинг навбатдагисига Париж шаҳри мезбонлик қила бошлади. 

Мусобақа бошланишига бир неча кун қолганда америкалик Ҳанс Ниеманн баҳларда қатнаша олмаслигини маълум қилди. Ташкилотчилар унинг ўрнига Нодирбек Абдусатторовга wild card, яъни имтиёзли йўлланма беришди. Ҳамюртимиз эса бу ишончни биринчи куннинг ўзида оқлай бошлади.

Илк кун 6 та тур учрашувлари ўтказилди. Нодирбек 1-турдаёқ Германия турнири чемпиони, германиялик Винсент Кеймарни мағлубиятга учратди. Кейин ўша мусобақа вице-чемпиони, рейтинг етакчиларидан бири Фабиано Каруана (АҚШ) ҳам мағлуб этилди. Учинчи турда венгриялик гроссмейстер Ричард Раппорт ҳам таслим бўлди. 

Максим Вашье-Лагрев (Франция) ва Ян Непомняший (Россия) билан дуранг ўйнаган Абдусатторов 6-турда ҳиндистонлик Видит Гужратини чиройли усулда мағлубиятга учратди. Биринчи кунги баҳслардан сўнг норвегиялик афсона Магнус Карлсен ҳамда Нодирбек Абдусатторов 6 имкониятдан 5 очкодан жамғариб, турнир жадвалида қўшҳокимлик қилишяпти. Магнус 5 учрашувда ғалаба қозониб, битта партияда ютқазиб қўйди. 

Бугун иккинчи кунги баҳсларда Нодирбек Магнус Карлсен (Норвегия), Гукеш Доммаражу (Ҳиндистон), Хикару Накамура (АҚШ), Аржун Эригаиси (Ҳиндистон), Рамешбабу Праггнанандҳа (Ҳиндистон)га қарши дона суради. 

Париж мусобақасининг умумий мукофот жамғармаси 680 000 АҚШ долларини ташкил қилади. Чемпион 200 000 АҚШ долларига эга бўлади. Сўнгги 12-ўринни эгаллаган шахматчи 7 500 долларни қўлга киритади.