Фьюри — Усик жанги рефериси маълум

Оқшомнинг марказий жанги "Йил жанги"га қиёсланмоқда ва унда супероғир вазн тоифасида мутлақ жаҳон чемпиони аниқланади. WBC чемпиони, британиялик Тайсон Фьюри қолган учта асосий камарлари соҳиби, украиналик Александр Усикка қарши рингга кўтарилади. 

Ташкилотчилар томонидан ушбу жангга ҳакам тайинланди. Америкалик рефери Марк Нельсон мағлубият нималигини билмай келаётган чемпионлар жангида ҳакамлик қилади. Бу рефери 2017 йилда филиппинлик афсона Мэнни Пакьяо ҳамда австралиялик Жефф Хорн ўртасидаги жангдаги ҳакамлиги билан эсда қолган. Ўшанда ҳакамларнинг қарори кескин муҳокамаларга сабаб бўлганди. 

Маълумот учун, 35 ёшли Тайсон Фьюри ўзининг сўнгги жангини ўтган йилнинг октябрь ойида камерунлик собиқ UFC чемпиони Фрэнсис Нганнуга қарши ўтказиб, ҳакамларнинг айри қарори билан ғалаба қозонган эди. 37 ёшли Александр Усик эса ўтган йилнинг августида британиялик Даниэль Дюбуани 9-раундда техник нокаутга учратиб, камарларини муваффақиятли ҳимоя қилганди.