Фьюри Усик ўрнига Уайлдер билан тўртинчи жангни ўтказиши мумкин

Фьюри Усикни 29 апрель куни "Уэмбли"да жангга чорлагани маълум бўлди.

Агар Александр Усик бу таклифни рад этса, Фьюри бошқаси билан жанг қилишини таъкидлади. Инсайдерларнинг фикрича, рақиб Деонтей Уайлдер бўлиши мумкин.

Фьюрининг вакиллари америкалик билан бир қанча вақтдан бери жангни ташкил этиш борасида яширин музокаралар олиб боришмоқда. Бироқ, Уайлдер билан жанг Фьюри ва Усик ўртасидаги тўқнашув муваффақиятсизликка учрасагина бўлиши таъкидланди.

Уайлдер ким биландир музокара олиб бораётганига унинг мураббийи Малик Скотт ҳам интервьюсида шаъма қилган эди.

"Жошуа жанг қилишни истамагани учун Деонтейга Энди Руис ва сирли вариант рақиб бўлади. Сирли рақиб ва Руис билан жанг кафолатланмаган. Бизнес нуқтаи назаридан қарасак, Руис билан жанг мажбурий даъвогарлик учун бўлади", - деди Уайлдернинг мураббийи.