Фьюри vs Жошуа. Тайсон жанг санаси ва манзилини тасдиқлади

WBC йўналиши чемпиони Тайсон Фьюри (30-0-1, 21 КО) WBA, IBF, WBO ҳамда IBO камарлари соҳиби Энтони Жошуа (24-1, 22 КО) ўзаро жангда супероғир вазннинг мутлақ қиролини аниқлаб беришади. Мутлақ жаҳон чемпиони номига ойдинлик киритадиган супержанг 14 август куни Саудия Арабистонида ўтказилади. Буни Фьюри ҳам тасдиқлади.

"Болалар, сизларга муҳим хабарим бор. Мен ҳозиргина Саудия Арабистони шаҳзодаси Халид билан телефонда гаплашдим. У менга бу жанг 100 фоиз белгиланган муддатда ўтказилишини айтди. 14 август 2021 йил – бутун дунё нигоҳи Саудия Арабистони Қироллигига қаратилади", - дея ўзининг Twitter саҳифасида видео мурожаат қилган Фьюри.

Тайсон Фьюри бу чиқишида ҳам Жошуани муддатидан аввал ишончли тарзда мағлуб этишини таъкидлади.

"Сабрсизлик билан жанг оқшомини кутаяпман. Такрор айтаман, мен дунёнинг барча даврлардаги энг катта бокс саҳнасида Энтони Жошуага сабоқ бериб қўяман. Бу ер шариининг барча замонлардаги энг катта спорт воқейлиги бўлади", – деди Фьюри.