Фьюрининг менежери: "Саудия Арабистони энди бундай катта маблағ сарфламайди"

"Мен уларни боксдан бутунлай кетади деб ўйламайман, — деди Браун "Uncrowned" нашрига берган интервьюсида. — Аммо ҳамма хотиржам бўлиши керак. Ҳа, пуллар камаяди, чунки ҳеч ким бундай гонорарларни тўлашда давом эта олмайди".

"Ўйлашимча, Фьюри — Жошуа жанги саудияликлар ташкил этадиган сўнгги йирик жанглардан бири, — дея қўшимча қилди Браун. — Келажакда йилига бир ёки иккита катта жанг бўлиши мумкин, лекин улар боксдан кетишмайди. Албатта, ҳаммаси Турки Ал аш-Шайхга ва унинг соғлиғига боғлиқ. Биз унинг яқинда берган баёнотини эшитдик".

Турки Ал аш-Шайх бокс оламига бир неча йил аввал кириб келган ва бир қатор йирик жангларни ташкил этишга ёрдам берган эди. Бироқ яқинда у онкологик касалликлар бўйича даволанаётганини ва яқин йилларда бу унинг когнитив қобилиятларининг жиддий ёмонлашувига олиб келиши мумкинлигини маълум қилди.

Саудия Арабистони Riyadh Season ва The Ring брендлари остидаги шоуларни молиялаштиришдан ташқари, янги "Zuffa Boxing" промоутерлик компаниясининг акциядорлари ҳам ҳисобланади. Эҳтимол, молиялаштиришнинг қисқариши Дана Уайт бошчилигидаги ушбу компанияга ҳам таъсир қилиши мумкин.