Германия ўз тарихида илк бор баскетбол бўйича жаҳон чемпиони бўлди

Ушбу баскетбол мундиали кутилмаган натижаларни тақдим этгани билан тарихга кирди. Мусобақа аввалида финал учрашувига Германия ва Сербия терма жамоалари етиб келади деса ҳеч ким ишонмаган бўлса керак. "Молл оф Азия-Арена"да бўлиб ўтган финалда немис баскетболчилари 83:77 ҳисобида зафар қучишди ва ўз тарихларида илк бор жаҳон чемпионига айланишди. 

Шу кунгача Германия 2002 йилги жаҳон чемпионатида бронза медалини қўлга киритганди. Финалнинг энг фойдали ўйинчиси Деннис Шрёдер бўлди, у ўз ҳисобига 28 очко ёздириб қўйди. Сербия таркибида Алекс Аврамович 21 очко жамғаришга муваффақ бўлди. Германия жаҳон чемпионатидаги барча 8 учрашувда ғалаба қозонди. Сербия эса финалгача гуруҳ босқичида фақат Италияга 76:78 ҳисобида ютқазганди.

Бронза медаль соҳибини аниқлаб берувчи учрашув ҳам "Молл оф Азия-Арена"да ўтказилди. Унда ярим финал аламзадалари Канада ва АҚШ терма жамоалари тўқнаш келишди. Учрашувда канадалик баскетболчилар овертаймда 127:118 ҳисобида ғалаба қозониб, жаҳон чемпионатининг бронза медалига сазовор бўлишди.