GFC 20. Нурсултон Рўзибоевнинг рақиби расман тасдиқланди

UFC юлдузи Хабиб Нурмагомедов фахрий меҳмон бўладиган ушбу оқшом доирасида 14 та жанг ўтказилади. Қизиқарли жанглардан бири ҳамюртимиз Нурсултон Black Рўзибоев иштирокида бўлиб ўтади. 

Чеченистоннинг "Аҳмад" клуби сафида ёрқин жанглари билан машхурликка эришган Нурсултон "Ҳумо Арена"да ўтадиган кечада украиналик Артём Шокалого қарши октагона чиқади. Жанг 83.9 кг вазн тоифасида ўтказилади. 

Маълумот учун, 25 ёшли Артём Шокало ММАдаги профессионал фаолиятини 2011 йилда бошлаган. Шу кунгача 46 та жанг ўтказиб, 24 ғалаба ва 22 мағлубият қайд этган. ACA, MG, FNG промоушенлари ташкил этган турнирларда октагонга чиққан. 

Дарвоқе, Нурсултон Рўзибоевнинг ажойиб жангларидан илхомланган Чеченистон Республикаси Президенти Рамзан Кадиров ҳамюртимизга автомобиль совға қилган эди.