21 июл 14:25
Янгиликлар

Кураш

Ғиждувон белбоғли кураш бўйича Ўзбекистон чемпионатига мезбонлик қилмоқда

Бухоро вилоятининг Ғиждувон туманидаги спорт мактабида белбоғли кураш бўйича 2007-2008 йилларда туғилган ўғил болалар ва қизлар ўртасида Ўзбекистон чемпионати бўлиб ўтяпти.

Ўзбекистон Республикаси Спорт вазирлиги ҳамда Ўзбекистон белбоғли кураш федерациясининг йиллик тақвим-режасидаги мазкур мамлакат чемпионатида Қорақалпоғистон Республикаси, Тошкент шаҳри ва барча вилоятлардан 270 нафардан ортиқ спортчилар иштирок этмоқда.

Мусобақада ўғил болалар эркин ва классик йўналишларда 13 та, қизлар эса эркин йўналишда 8 та вазн тоифасида куч синашмоқда. Дастлаб чемпионатнинг тантанали очилиш маросими ҳам ташкил этилди.

Унда Ўзбекистон белбоғли кураш федерацияси раиси Равшан Дастиров, Бухоро вилояти прокурори Улуғбек Ҳамдамов, Бухоро вилояти Ички ишлар бошқармаси бошлиғи Икромжон Турсунов, вилоят спорт бошқармаси бошлиғи Ўткир Нажмиддиновлар иштирок этди.