Гилберт Бёрнснинг навбатдаги рақиби ва жанг санаси маълум бўлди

Ушбу турнирдан ўрин олган навбатдаги жанг маълум бўлди. Унга кўра, ярим ўрта вазн тоифасида бразилиялик аралаш якка кураш устаси Гилберт Бёрнс (22-6-0) UFC 299 турнирида жанг қилади. Унга австралиялик Жек Делла Маддалена (16-2-0) рақиблик қилади. Жанг 3 раунд этиб белгиланган.

Аввалроқ, ушбу мусобақа доирасида қозоғистонлик Асу Алмабаев ҳам жанг қилиши ҳақида хабар берган эдик. Турнирнинг марказий жанги энг енгил вазн чемпиони Шон О'Мэлли ҳамда даъвогар Марлон Вера ўртасида ўтказилади.

Эслатиб ўтамиз, Гилберт Бёрнс UFC'да шу кунгача 21 та жанг ўтказган ва уларнинг 15 тасида ғалаба қозонган, олтита жангда рақиблари олдида ожиз қолган. У сўнгги жангини 2023 йил май ойида Белал Муҳаммадга қарши ўтказиб, очколар ҳисобига кўра мағлуб бўлган эди.

27 ёшли Жек Делла Маддалена эса UFC'да ҳозирча олтита жанг ўтказиб, барчасида ғалаба қозонган. Австралия вакили ўзининг охирги жангини 2023 йил сентябрь ойида Кевин Ҳолландга қарши ўтказиб, очколар ҳисобига кўра зафар қучган эди.