Гимнастика ИБЎСМда «Очиқ эшиклар куни» ташкил этилди

Ўзбекистон Республикаси Президентининг 2020 йил 30 октябрдаги «Соғлом турмуш тарзини кенг татбиқ этиш ва оммавий спортни янада ривожлантириш чора-тадбирлари тўғрисида»ги Фармони ижросини таъминлаш ҳамда ўқувчи ёшларни спортга қизиқтириш, ўсиб келаётган ёш авлод қалбида ватанпарварлик, она Ватанга садоқат туйғуларини шакллантириш, ўқувчи-ёшлар орасида спортнинг бадиий гимнастика турини кенг тарғиб қилиш мақсадида Бухоро вилояти Гимнастика бўйича ихтисослаштирилган болалар-ўсмирлар спорт мактабида «Очиқ эшиклар куни» тадбирлари ташкил этиб келинмоқда.

Бугун ҳам ана шундай тадбирлардан бири ташкил этилди. Унда Бухоро шаҳар 21-сонли умумтаълим мактабининг 50дан ортиқ ўқувчи ёшлари учун спорт мактаби шуғулланувчилари томонидан кўргазмали чиқишлар намойиш этилди.

Тадбирнинг иккинчи қисмида болалар-ўсмирлар спорт мактаби тренери, халқаро тоифадаги спорт устаси Даря Свечникова ҳамда ёш бадиий гимнастикачилар ўқувчиларни қизиқтирган саволларга жавоб беришди.

Тадбир сўнгида 21-сонли умумтаълим мактаби раҳбарияти Бухоро вилояти Гимнастика бўйича ИБЎСМ тренерлари ҳамда шуғулланувчиларига миннатдорлик билдирди.