Гимнастика мактабига ўқувчиларни қабул қилиш тартиби тасдиқланди

Гимнастика бўйича республика ихтисослаштирилган олимпия захиралари болалар-ўсмирлар спорт мактабига ўқувчи-спортчиларни конкурс асосида танлаб олиш ва қабул қилиш тартиби тўғрисидаги низом Адлия вазирлигида давлат рўйхатидан ўтказилди. Бу ҳақида вазирликнинг “Ҳуқуқий ахборот” канали маълум қилди.

Низомга мувофиқ, гимнастика мактабига ўқувчи-спортчилар бадиий гимнастика, спорт гимнастикаси ва трамполин спорт турлари бўйича қабул қилинади.

Ҳужжатларни қабул қилиш бошланишидан икки ой олдин гимнастика мактаби томонидан танлов ўтказилиши тўғрисида оммавий ахборот воситаларида эълон берилади. 

Ҳужжатлар ҳар йили 1 августдан 10 августгача (шу куни ҳам) қабул қилинади.

Жисмоний тайёргарлик даражасини аниқлаш бўйича синов ҳар йили 20–25 август кунлари гимнастика мактаби биносида ташкил этилади.

Синовлар видео ёзув орқали ёзиб олинади ва гимнастика мактабида сақланади.

Синов натижалари синов ўтказилган вақтдан бошлаб 1 кун ичида гимнастика мактабининг барча шахслар кириши ва кўриши мумкин бўлган жойлардаги эълонлар тахтасига осиб қўйилади.

Синов натижаси эълон қилинган вақтдан бошлаб 3 кун давомида апелляция бериш мумкин. 

Апелляция 3 кун ичида кўриб чиқилиши лозим.