Гимнастикачиларимиз Осиё чемпионатида 8 та олтин медаль олишди

Қитъамизнинг энг кучли гимнастикачилари ўртасида кечган беллашувда терма жамоамиз вакиллари муносиб иштирок этишди.

Қизларимиз сўнгги кун дастурида ҳам ўзларининг ажойиб чиқишлари билан ҳакамлар ва мухлисларнинг эътибор марказида бўлишди. Ўсмирларимиз халқада, катталар эса 3 та халқа ва 2 та булавада ўтказилган гуруҳ машқида энг юқори балл билан олтин медалларни қўлга киритишди. 

Шунингдек, Тахмина Икромова тасмада машқ қилиш бўйича ҳам қитъамизда тенгсиз эканлигини намойиш этди. Айни шу элемент бўйича ўтказилган гуруҳ баҳсида эса терма жамоамиз вакилларига иккинчи ўрин насиб этди.

Шу тариқа, мазкур Осиё чемпионатида гимнастикачи қизларимиз 8 та олтин, 4 та кумуш ва 1 та бронза медалларини жамғаришди. Терма жамоамиз эртага 13:00 да Тошкентга қайтиб келади.