Гиннесс рекордлар китобига кирган Рима Баталова ЎзДЖТСУда меҳмон бўлди + ФОТО

Ташриф аввалида меҳмон университетда ўтказилаётган “Яшил макон” лойиҳаси асосида амалга оширилаётган кўчат экиш жараёнларида қатнашди. Шундан сўнг, Рима Баталова иштирокида учрашув ўтказилди.

Унда Жаҳон белбоғли кураш ассоциацияси президенти Азиз Ғаниев, Олий Мажлис қонунчилик палатаси депутати Қодир Жўраев, Ўзбекистон Белбоғли кураш федерацияси раиси Равшан Дастиров, Чирчиқ шаҳар ҳоким ўринбосари Оила ва хотин-қизлар бўлими бошлиғи Юлдуз Жумаева, университет проректорлари, Паралимпия ва Кураш факультети деканлари, профессор-ўқитувчилар, тюторлар ва талабалар иштирок этишди.

Учрашув давомида фахрли меҳмон ўзининг қўлга киритган ютуқлари ҳамда эришган муваффақиятлари сири билан ўртоқлашди ва мамлакатимизда миллий спорт турлари, паралимпия спорт турларини ривожлантириш, шу қаторда уларда хотин-қизлар иштирокини таъминлаш юзасидан ўзига хос фикр-мулоҳазалар билдирди. Талабалар ҳам учрашув қахрамонига ўзларини қизиқтирган саволларини йўллашди. 

Шунингдек, меҳмон томонидан Жаҳон белбоғли кураш ассоциацияси президенти А. Ғаниевга ҳамкорлик учун миннатдорчилик рамзи сифатида ташаккурнома топширилди. Энг яхши савол эгасига эса Рима Баталованинг муаллифлик китоби совға қилинди. Ўз навбатида университет раҳбарияти ҳам Рима Баталовага ташаккурнома ва эсдалик совғалари тақдим этди.

Давра суҳбатидан сўнг фахрли меҳмон университет ректори, профессор М. Болтабаев бошчилигидаги раҳбарият жамоаси иштирокида университет музейи ва ТТЖда яратилган шароитлар билан яқиндан танишди. Бундан ташқари Р. Баталова мезбонлар билан биргаликда университет ҳудудида эсдалик учун кўучат экди.

Илҳом РАҲМОНОВ тайёрлади