Гловер Тейшейра Маурисио Руа билан бокс жангида тўқнаш келади

Бразилиянинг Spaten Fight Night промоушени навбатдаги турнири учун яна бир катта жангни эълон қилди. Ташкилотнинг учинчи турнири 29 август куни Сан-Паулуда бўлиб ўтади ва кечанинг марказий баҳсида UFC’нинг собиқ ярим оғир вазн чемпионлари Гловер Тейшейра ҳамда Маурисио «Шогун» Руа рингга кўтарилади.

Маълум қилинишича, икки бразилиялик афсона ўртасидаги баҳс бокс қоидалари асосида ўтказилади. Жанг ҳар бири икки дақиқадан иборат саккиз раундга мўлжалланган.

Spaten Fight Night аввал ҳам аралаш яккакураш оламидаги машҳур номларни бирлаштирган эди. Дебют турнирида Чейл Соннен ва Андерсон Силва ўзаро баҳслашган бўлса, иккинчи шоуда Вандерлей Силва ҳамда собиқ жаҳон чемпиони Аселино Фрейтас тўқнаш келган.

Биринчи турнир жангчиларнинг ўзаро эҳтиёткорлиги ва ҳаддан ташқари ҳурмат билан ҳаракат қилгани учун мухлислар томонидан танқид қилинганди. Иккинчи шоу эса жангдан кейин чиққан оммавий муштлашув сабаб катта шов-шувга сабаб бўлган.

Ташкилот бу сафар ҳам бир-бирига катта ҳурмат билан қарайдиган икки собиқ чемпионни танлади. 46 ёшли Тейшейра ва 44 ёшли «Шогун»нинг қарама-қаршилиги мухлисларда катта қизиқиш уйғотмоқда.

Эслатиб ўтамиз, ҳар икки жангчи октагондаги сўнгги иштирокини 2023 йил январь ойида UFC 283 турнирида ўтказган. Ўшанда Гловер Тейшейра чемпионлик жангида Жамал Ҳиллга ҳакамларнинг якдил қарори билан мағлуб бўлган бўлса, Маурисио Руа биринчи раундда Игор Потерьяга техник нокаут билан ютқазган эди.