01 дек 08:13
Янгиликлар

Бокс/ММА

Ғофур Раҳимов AIBA президентлигидан кетишга тайёр

Халқаро ҳаваскорлар бокс ассоциацияси (AIBA) президенти Ғофур Раҳимов бокснинг Олимпиада-2020даги тақдири хавф остида қолса, лавозимини тарк этишга тайёр эканлигини маълум қилган.

Бу ҳақда Россия бокс федерацияси бош котиби, AIBA ижроқўми аъзоси Умар Кремлёв хабар берди.

Хабар берганимиздек, Халқаро олимпия қўмитаси (ХОҚ) кеча Токиода ўз ишини бошлаган ташкилотнинг Ижроқўм йиғилишида AIBAнинг Токио-2020 олимпия ўйинлари доирасидаги бокс турнирини ўтказиш режаларини музлатиб қўйган эди.

Қўлланилган бу санкция AIBA фаолиятига чек қўйиши ҳам мумкин.

“Ўйлашимча, бокс Олимпиада дастуридаги ўрнини сақлаб қолиш учун имкониятга эга. Айни пайтда AIBA барқарор молиявий таъминотга эга. Шу пайтгача йиғилиб қолган муаммолар янги раҳбарият томонидан бартараф этилди. Миллий федерациялар ноябрь ойи бошида ўтказилган сайловда ўз танловларини амалга оширишди. ХОҚ буни ҳурмат қилиши керак. Агар вазият шу тарзда давом этадиган бўлса, Ғофур Раҳимов ўзи аввал айтганидек, AIBA президентлигидан кетиши мумкин”, - деди Кремлёв.