Ғолиби 6 млн долларни қўлга киритган Six Kings Slam турнири якунланди

Дунёнинг олти нафар теннис қироллари иштирок этган Six Kings Slam мусобақасида бош соврин Янник Синнерга насиб этди. Сайёрамизнинг биринчи ракеткаси ҳал қилувчи финал баҳсида дунёнинг иккинчи рақамли теннисчиси, испаниялик Карлос Алькаразни уч сет натижасига кўра мағлубиятга учратди - 6/7(5), 6/3, 6/3.

Икки соату 21 дақиқа давом этган баҳсда Синнер 5, Алькараз 2 та эйс зарбасини амалга оширган. Брейклар бўйича ҳам устунлик худди шу ҳисоб кўринишида италиялик фойдасига ҳал бўлди. Синнер қўшхатога йўл қўймади. Карлосда иккита қўшхато кузатилди. 

Шу тариқа, Янник Синнер мусобақа бош соврини билан бирга 6 миллион АҚШ доллари миқдоридаги мукофот пулини ҳам қўлга киритди. Алькараз эса Six Kings Slam турнирининг қолган иштирокчилари каби 1,5 млн долларга эга бўлди.