29 май 17:34
Янгиликлар

Бокс/ММА, Қизиқарли!

"Гўзал, аммо жуда хавфли": Лиана Жожуа билан яқиндан танишамиз

"Гўзал, бетакрор, латофатли" рукнининг Сабина Алтинбековага бағишланган 1-сони 25 май куни ўқувчилар эътиборига ҳавола қилингач, навбатдаги сон учун бир неча таклиф келиб тушди.

"Гўзал, бетакрор, латофатли": Сабина Алтинбековани яқиндан биласизми? (+ФОТО)

Биз Ниғмонхўжа Нозимовнинг жиддий оҳангдаги илтимосини қабул қилиб, UFC гўзалига тўхталишга қарор қилдик. Демак, бугун Лиана Жожуа ҳақида гаплашамиз.

У 1995 йилнинг март ойида Грузияда, мамлакат пойтахти Тбилиси шаҳрида туғилган.

Жожуа болаликдан санъатга жиддий тарзда қизиққан. У фортепианони маромига етказиб чала олади. Балки, 16 ёшида америкалик Жина Каранонинг ММАдаги жангларини кўриб, мазкур спорт турига қизиқиш пайдо бўлмаганида, у ҳозир актриса ёки мусиқа ўқитувчиси бўлиши ҳам мумкин эди.

Лиана ҳам олдинги сонда айтилгани каби октагондаги ҳаракатлари эмас, кўпроқ ташқи кўриниши билан машҳурроқ.

ММАга муай-тайдан кириб келган Жожуа бугунгача 12 та жанг ўтказишга улгурди ва улардан 8 тасида ғалабага эришган (4 мағлубият).

Лиана Грознийнинг "Ахмат" аралаш яккакураш клуби аъзоси ҳисобланади.

Рус фуқаролигини қабул қилган спортчи жангларга Россия номидан чиқади.

Дарвоқе, у Москва Давлат Педагогика Университетини тамомлаган. Келажакда ўқитувчи сифатида фаолият юритмоқчи. Грузин гўзалининг бўлажак ўқувчиларига ҳавас қилишни ҳам, ачинишни ҳам билмайсан киши...