Grand Swiss. 15 ёшли халқаро гроссмейстеримиз Қосимжоновни ортда қолдирди

Мукофот жамғармаси 433 000 АҚШ долларини ташкил этувчи Grand Swiss турнирида Ўзбекистон шарафини 17-жаҳон чемпиони Рустам Қосимжонов ҳамда 15 ёшли халқаро гроссмейстеримиз Нодирбек Абдусаттаров ҳимоя қилмоқда. Қосимжонов 2657, Абдусаттаров эса 2608 рейтинг очкосига эга. 

Мусобақада муваффақиятли дона сураётган истеъдодли шахматчимиз, 15 ёшли халқаро гроссмейстер Нодирбек Абдусатторов 10-турда россиялик халқаро гроссмейстер Григорий Опарин (2654)га қарши қора доналарда баҳс олиб борди ва кучли рақиб билан дурангга эришди. 

Ўн имкониятдан 5,5 очко жамғарган Нодирбек қўшимча кўрсаткичларга кўра 43-ўринни эгаллаб турибди. Бу борада у Рустам Қосимжоновдан ўтиб кетди. Мусобақада 106-рақам остида таснифланган шахматчимиз учун бу ёмон натижа эмас. Бугун сўнгги 11-турда ҳамюртимиз оқ доналарда россиялик гроссмейстер Алексей Сарана (2655)га қарши баҳс олиб боради.