Grand Swiss 2025. Абдусатторов карвонбоши билан ўйнади, Афруза пешқадамлар сафида

Мусобақанинг асосий мақсади — дунё рейтингининг ТОП-100 талигига кирган кучли шахматчилар орасидан тўрт нафар талабгорни (2 эркак ва 2 аёл шахматчи) жаҳон шахмат тожи учун бўладиган “Талабгорлар турнири”га саралаб олишдан иборат.

Турнирнинг 4-турида Нодирбек Абдусатторов (2748) қора доналарда мусобақада 100 фоизлик кўрсаткич билан пешқадамлик қилиб келаётган эронлик Парҳам Мақсудлуга қарши баҳс олиб борди ва дурангга имзо чекди. Бу билан OPEN турнирида очко йўқотмаган иштирокчи қолмади. 

Қувонарлиси, Нодирбек Якуббоев (2681) ҳам Абдусатторов сингари ўз очколарини 3 тага етказиб олди. У 4-турда қора доналарда ўйнаганига қарамай, украиналик гроссмейстер Юрий Кузубов (2600)ни чиройли тарзда мағлубиятга учратди. Самарқанддаги турнирни омадсиз ўтказаётган Жавоҳир Синдаров (2722) учинчи дурангини қайд этди. Учинчи турда  кутилмаганда украиналик Иван Чепаринов (2627)га ютқазиб қўйган Жавоҳир кеча 4-турда қора доналарда бельгиялик Даниэль Дардҳа (2624) билан муросага келди. 

Бу турда шахматчиларимиздан Муҳиддин Мадаминов (2560) арманистонлик Шант Саргсян (2653)га, Абдималик Абдисалимов (2488) сербиялик Велимир Ивич (2630)га, Ортиқ Ниғматов грециялик Николас Теодору (2646)га, Жаҳонгир Воҳидов сербиялик Александар Инжич (2650)га имкониятни бой берди. Муҳаммадзоҳид Суяров (2482) ва Шамсиддин Воҳидов (2645) 4-турда рақиблари билан дуранг ўйнашди. 

Амалдаги жаҳон чемпиони Гукеш Доммараджу (2767) ҳинд дербисида Аржун Эргаиси (2771) билан дурангга имзо чекди. Рамешбабу Праггнанандҳа (2785) америкалик Мишра Абҳиманю (2611) билан дуранг ўйнади. Бешинчи тур олдидан Парҳам Мақсудлу 3,5 очко билан пешқадамлигини сақлаб қолди. Ўн уч нафар иштирокчи ҳисобида 3 тадан очко бор. Қўшимча кўрсаткичларга кўра Мишра Абҳиманю ва туркиялик Ягиз Эрдогмуз кучли учликдан жой олишган. Нодирбек Абдусатторов 3 очко билан 8, Нодирбек Якуббоев 13-ўринни банд этган. 

WOMENS, яъни аёллар гуруҳида ҳамюртимиз Гулруҳбегим Тоҳиржонова (2372) рейтингда ўзидан юқорида бораётган украиналик Юлия Осмак (2478) билан дуранг ўйнади. Афруза Ҳамдамова америкалик гроссмейстер, бир неча карра АҚШ чемпиони Ирина Кришни мағлуб этишни уддалади ва очколарини 3 тага етказиб олди. Мадинабону Халилова (2148) бу турда қозоғистонлик Ксения Балабаева (2383) билан муросага келди. Умида Омонова (2252) қора доналарда ўйнаганига қарамай, рейтингда ўзидан юқорида турган грузиялик Мери Арабидзе (2444)ни мағлуб этишни уддалади. Гулдона Каримова (2324) болгариялик гроссмейстер, жаҳон чемпиони Антоанетта Стефанова (2395)га ютқазиб қўйди.   

WOMENS гуруҳида 4-турдан кейин FIDE байроғи остида ўйнаётган россиялик Катерина Лагно (2505) ва ҳиндистонлик Рамешбабу Вайшали (2452) 3,5 очкодан жамғариб, турнир жадвалида қўшҳокимлик қилишяпти. Озарбайжонлик Улвия Фаталиева (2385), германиялик Динара Вагнер (2400), ҳамюртимиз Афруза Ҳамдамова, болгариялик Антоанетта Стефанова ва руминиялик Ирина Булмага (2400) ҳисобида 3 тадан очко бор.