Grand Swiss 2025. Абдусатторов пешқадамга, Гулдона жаҳон чемпионига қарши (4-тур жуфтликлари)

Учинчи турдан сўнг турнир жадвалида якка пешқадамлик қилаётган эронлик гроссмейстер Парҳам Мақсудлу (2692) тўртинчи турда биринчи тахтада ҳамюртимиз Нодирбек Абдусатторов (2748)га қарши оқ доналарда ўйнайди. Парҳам ўтган турда франциялик Алиреза Фирузжани таслим этганди. Айнан Мақсудлу 3 та учрашувнинг барчасида ғалаба қозонган ягона иштирокчи бўлиб турибди. Агар бугун Абдусатторов Мақсудлуни мағлуб эта олса, турнир жадвалида пешқадам бўлиб олиши мумкин.   

Уч имкониятдан 2 очко тўплаган Нодирбек Якуббоев қора доналарда ўзи билан бир хил очкога эга украиналик Юрий Кузубовга қарши баҳс олиб боради. Икки дуранг ва бир мағлубиятга эга Жавоҳир Синдаров қора доналарда бельгиялик Даниэль Дардҳа билан ҳисоб-китоб қилади. 

Аёллар ўртасидаги турнирда шахматчи-қизларимиз орасида энг яхши натижага эга бўлиб турган Гулдона Каримова (2324) 4-турда болгариялик жаҳон чемпиони Антоанета Стефановага қарши баҳс олиб боради. Гулдона 2 очко билан қўшимча кўрсаткичларга кўра 12-ўринни эгаллаб турибди. Бешинчи ўриндаги озарбайжонлик Улвия Фаталиева ҳисобида ҳам 2 очко бор.

Икки очкога эга яна бир вакиламиз Афруза Ҳамдамова бугун 4-турда бир неча карра АҚШ чемпиони Ирина Круш билан тўқнаш келади. Тўртинчи тур олдидан худди эркаклар турнирида бўлгани каби ягона пешқадам юзага келди. Ҳиндистонлик Рамешбабу Вайшали (2452) 3 очко билан якка карвонбошилик қилмоқда. Тўрт нафар иштирокчи 2,5 очкодан жамғарган.