Grand Swiss 2025. Абдусатторов ва Гукеш ғалаба билан бошлади, Умида ва Афруза рақибларини таслим этди + ФОТО

Мусобақанинг асосий мақсади — дунё рейтингининг ТОП-100 талигига кирган кучли шахматчилар орасидан тўрт нафар талабгорни (2 эркак ва 2 аёл шахматчи) жаҳон шахмат тожига бўладиган “Талабгорлар турнири”га саралаб олишдан иборат.

Турнирнинг 1-турида Нодирбек Абдусатторов (2748) оқ доналарда cербиялик Велимир Ивич (2630)ни мағлубиятга учратди. Жавоҳир Синдаров (2722) арманистонлик Арам Ҳакобян (2625) билан дурангга имзо чекди. Ўзига хос ўзбек дербисида Ортиқ Ниғматов ва Шамсиддин Воҳидов ўзаро муросага келишди. 

WOMENS, яъни аёллар гуруҳида ҳамюртимиз Гулруҳбегим Тоҳиржонова ҳиндистонлик жиддий рақиб Рамешбабу Вайшалига имкониятни бой бериб қўйди. Афруза Ҳамдамова швейцариялик Мария Манкони, Умида Омонова рейтингда ўзидан юқорида турган польшалик Оливия Киолбасадан устун келди. 

FIDE “Grand Swiss 2025” — 1-раунд натижалари (Ўзбекистон вакиллари) OPEN:

Нодирбек Абдусатторов — Велимир Ивич (Сербия) 1:0

Жавоҳир Синдаров — Арам Ҳакобян (Арманистон) 0,5:0,5

Нодирбек Якуббоев — Мишра Абҳиманю (АҚШ) 0,5:0,5

Муҳиддин Мадаминов — Даниил Юффа (Испания) 0,5:0,5

Жаҳонгир Воҳидов — Николас Теодороу (Греция) 0,5:0,5

Абдималик Абдисалимов — Максим Родштейн (Исроил) 0:1

Ортиқ Ниғматов — Шамсиддин Воҳидов 0,5:0,5

Муҳаммадзоҳид Суяров — Фредерик Сван (Германия) 0:1

Аёллар (WOMENS):

Гулруҳбегим Тоҳиржонова — Рамешбабу Вайшали (Ҳиндистон) 0:1

Гулдона Каримова — Сонг Юксин (Хитой) 0,5:0,5

Афруза Ҳамдамова — Мария Манко (Швейцария) 1:0

Умида Омонова — Оливия Киолбаса (Польша) 1:0

Мадинабону Халилова — Антоанета Стефанова (Болгария) 0,5:0,5

Бошқа натижаларга тўхталадиган бўлсак, 1-турда амалдаги жаҳон чемпиони ҳиндистонлик Гукеш Доммараджу қора доналарда ўйнаганига қарамай, франциялик Этьен Бакрони мағлубиятга учратди. Аржун Эргаиси испаниялик Максим Чигаев, Ян Непомняший Андрей Волокитин, Рамешбабу Праггнанандҳа америкалик Жеффери Ксионг, Максим Вашье-Лаграв Санан Сюгиров билан муросага келди. 

Алиреза Фирузджа, Аниш Гири, Видит Сантош Гужрати, Парҳам Мақсудлу, Сэм Шанкланд сингари жами 17 нафар гроссмейстер 1-турда ғалаба нашидасини сурди.