Grand Swiss 2025. Абдусатторов ва Гукеш очко йўқотди, уч шахматчида юз фоизлик натижа

Мусобақанинг асосий мақсади — дунё рейтингининг ТОП-100 талигига кирган кучли шахматчилар орасидан тўрт нафар талабгорни (2 эркак ва 2 аёл шахматчи) жаҳон шахмат тожи учун бўладиган “Талабгорлар турнири”га саралаб олишдан иборат.

Турнирнинг 2-турида Нодирбек Абдусатторов (2748) қора доналарда германиялик Фредерик Свен (2643) билан дуранг ўйнади. Жавоҳир Синдаров (2722) қаторасига иккинчи учрашувида ҳам дурангга имзо чекди. Бу сафар у қора доналарда германиялик Расмус Свен (2620) билан муросага келди. Нодирбек Якуббоев (2681) қора доналарда ўйнаганига қарамай, хитойлик гроссмейстер Сянюй Сюй (2615)ни мағлубиятга учрата олди. 

WOMENS, яъни аёллар гуруҳида ҳамюртимиз Гулруҳбегим Тоҳиржонова (2372) кетма-кет иккинчи мағлубиятини қабул қилиб олди. Бу сафар у АҚШдаги собиқ жамоадоши Карисса Йип (2458)га имкониятни бой берди. Афруза Ҳамдамова қозоғистонлик Ксения Балабаева билан дуранг ўйнади. Биринчи турда зафар қучган Умида Омонова 2-турда жаҳон ва Европа чемпиони Катерина Лагнога ютқазиб қўйди.

Амалдаги жаҳон чемпиони Гукеш Доммараджу (2767) 2-турда оқ доналарда туркиялик Ягис Эрдогмус (2646) билан дуранг қайд этди. Бу икки гроссмейстер ҳам 1-турда ғалаба қозонишган эди. Учинчи тур олдидан уч иштирокчи - словениялик Антон Демченко (2620), франциялик Алиреза Фирузджа (2754) ва эронлик Парҳам Мақсудлу (2692) юз фоизлик натижа билан турнир жадвалида пешқадамлик қилишмоқда. Жами 29 нафар шахматчи ҳисобида 1,5 очкодан бор.

FIDE “Grand Swiss 2025” — 2-раунд натижалари (Ўзбекистон вакиллари):