Grand Swiss 2025. Абдусатторов ва Гукешда ғалаба, очко йўқотмаган бир шахматчи қолди

Мусобақанинг асосий мақсади — дунё рейтингининг ТОП-100 талигига кирган кучли шахматчилар орасидан тўрт нафар талабгорни (2 эркак ва 2 аёл шахматчи) жаҳон шахмат тожи учун бўладиган “Талабгорлар турнири”га саралаб олишдан иборат.

Турнирнинг 3-турида Нодирбек Абдусатторов (2748) оқ доналарда ҳиндистонлик Пураник Абҳиманю (2640)ни мағлубиятга учратди. Бу унинг турнирдаги иккинчи ғалабаси бўлди. Жавоҳир Синдаров (2722) кетма-кет иккита дурангдан кейин бироз кутилмаганда украиналик Иван Чепаринов (2627)га имкониятни бой бериб қўйди. 

Нодирбек Якуббоев (2681), Муҳиддин Мадаминов (2560), Муҳаммадзоҳид Суяров (2482), Абдималик Абдисалимов (2488) 3-турда рақиблари билан дуранг ўйнашди. Ортиқ Ниғматов (2488) рейтингда ўзидан анча юқорида турган сербиялик Велимир Ивич (2630)ни мағлуб этишга муваффақ бўлди.  

WOMENS, яъни аёллар гуруҳида ҳамюртимиз Гулруҳбегим Тоҳиржонова (2372) кетма-кет икки мағлубиятдан кейин ниҳоят ғалаба қозонди. Бу сафар у қора донараларда Белен Баррера Гомесдан устун келди. Афруза Ҳамдамова, Гулдона Каримова Мадинабону Халилова кучли рақибалари билан муросага келишди. Айниқса, Мадинабону қора доналарда ўйнаганига қарамай, уч карра жаҳон чемпиони, аёллар ўртасида 2600 рейтингни биринчи бўлиб забт этган Анна Музичук билан дуранг ўйнади. Умида Омонова бу турда тажрибали Анна Ушенинага ютқазиб қўйди. 

Амалдаги жаҳон чемпиони Гукеш Доммараджу (2767) 3-турда қора доналарда испаниялик Даниил Юффа (2646)ни мағлубиятга учратди. Учинчи тур олдидан уч иштирокчи - словениялик Антон Демченко (2620), франциялик Алиреза Фирузджа (2754) ва эронлик Парҳам Мақсудлу (2692) юз фоизлик натижа билан турнир жадвалида пешқадамлик қилишаётганди. Учинчи турда етакчилар ўзаро тўқнаш келишди. Парҳам Мақсудлу қора доналарда ҳаракат қилганига қарамай, Фирузджани мағлуб этишни уддалади. Демченко эса ҳиндистонлик Аржун Эргаисига ютқазиб қўйди. Очко йўқотмаган биргина Мақсудлу қолди. 

Америкалик Мишра Абҳиманю, польшалик Шимон Гумулярз, Гукеш Доммараджу, Рамешбабу Праггнанандҳа, Нодирбек Абдусатторов ва Аржун Эргаиси 2,5 очкодан жамғариб, 2-7 -ўринларни банд этишган. Жами 33 нафар иштирокчи 2 очкодан тўплаган. Улар орасида Нодирбек Якуббоев ҳам бор.