Grand Swiss. Рустам Қосимжонов 5-тур учрашувини ўтказди

Мукофот жамғармаси 433 000 АҚШ долларини ташкил этувчи Grand Swiss турнирида Ўзбекистон шарафини 17-жаҳон чемпиони Рустам Қосимжонов ҳамда 15 ёшли халқаро гроссмейстеримиз Нодирбек Абдусаттаров ҳимоя қилмоқда. Қосимжонов 2657, Абдусаттаров эса 2608 рейтинг очкосига эга. 

Кеча ўтказилган 5-партияда Рустам Қосимжонов қора доналарда ҳаракат қилди ва рейтингда ўзидан анча юқорида турган россиялик халқаро гроссмейстер, мусобақанинг 11-рақамли шахматчиси (Қосимжонов 56-рақам остида сараланган) Владислав Артемиев (2746) билан дуранг ўйнади. 

Маълумот учун, Рустам Қосимжонов 3-турда амалдаги жаҳон чемпиони норвегиялик Магнус Карлсен билан ҳам муросага келганди. Бугун у 6-турда оқ доналарда ўзи сингари 3 очко жамғариб турган ҳиндистонлик халқаро гроссмейстер Сантош Видит Гужрати (2718) билан муносабатларига ойдинлик киритиб олади.