Grand Swiss. Рустам Қосимжонов дуранг, Абдусатторов ғалаба билан бошлади

Мусобақада амалдаги жаҳон чемпиони норвегиялик Магнус Карлсен, жаҳон вице-чемпионлари Вишванатан Ананд (Ҳиндистон), Фабион Каруана  (АҚШ), Сергей Карякин (Россия) каби машҳур шахматчилар дона суришяпти. 

Мукофот жамғармаси 433 000 АҚШ долларини ташкил этувчи Grand Swiss турнирида Ўзбекистон шарафини 17-жаҳон чемпиони Рустам Қосимжонов ҳамда ёш халқаро гроссмейстеримиз Нодирбек Абдусаттаров ҳимоя қилмоқда. Қосимжонов 2657, Абдусаттаров эса 2608 рейтинг очкосига эга. 

Рустам Қосимжонов биринчи турда исроиллик халқаро мастер Ариэль Эренергга қарши қора доналарда ҳаракат қилиб, муросага келди. Нодирбек эса қора доналарда ўйнашига қарамай, рейтингда ўзидан юқорида турган англиялик халқаро гроссмейстер Гавайн Жонс (2688)ни мағлубиятга учратди. 

Бугун 2-турда Рустам Қосимжонов оқ доналарда хитойлик Тинг Жие Лей (2469)га, Нодирбек Абдусатторов эса россиялик халқаро гроссмейстер Антон Демченко (2655)га қарши дона суради.    

Маълумот учун, 22 октябрь куни якунига етадиган Grand Swiss турнири ғолиби 70 000, иккинчи ўрин соҳиби 50 000, учинчи ўрин эгаси эса 40 000 АҚШ доллари миқдоридаги мукофот пулига эга бўлади. Кучли ўттизликка кира олган шахматчига эса 2000 АҚШ доллари тақдим этилади.