Grenke Freestyle Chess Open. Жавоҳир Синдаров юз фоизлик натижа билан пешқадамлар сафида

Бир нечта гуруҳда ўтказилаётган мусобақанинг кучлилар жам бўлган А гуруҳида гроссмейстеримиз Жавоҳир Синдаров ҳам муваффақиятли одимлаяпти. Кеча ҳамюртимиз ўтказилган ҳар икки тур учрашувида ғалабага эришди. У 1-турда қора доналарда германиялик Детлев Волтерни мағлубиятга учратганди. 

Иккинчи турда Синдаров оқ доналарда германиялик Йонас Роснердан устун келди. Учинчи турда қора доналарда ҳаракат қилганига қарамай, польшалик гроссмейстер Пёрун Касперни енгди. 

Мусобақанинг биринчи рақамли иштирокчиси Магнус Карлсен ҳам дастлабки уч учрашувда ғалаба қозонди. Иккинчи рақам остида таснифланган америкалик Фабиано Каруана оқ доналарда ўйнашига қарамай, француз Этьенн Бакрога имкониятни бой бериб қўйди. Учинчи турдан кейин 14 нафар иштирокчи юз фоизлик натижа қайд этиб турибди.

Бугун мусобақанинг 4-турида Жавоҳир Синдаров оқ доналарда ҳиндистонлик гроссмейстер Пранешга қарши баҳс олиб боради. Магнус Карлсен қора доналарда Этьенн Бакро билан ҳисоб-китоб қилади.  

Grenke Freestyle Chess Open мусобақасининг мукофот жамғармаси 225 000 еврони ташкил этади. Чемпион 60 000 евро билан бирга Лас-Вегасда ўтказиладиган Freestyle Chess турнирида қатнашиш ҳуқуқини қўлга киритади. Иккинчи ўрин соҳиби 40 000, учинчи ўрин эгаси 30 000 еврога эга бўлади. Топ-10`таликни якунлаб берган шахматчи 3000 еврога эга чиқади.