Grenke Freestyle Chess Open. Жавоҳир Синдаровда ғалаба, Магнус Карлсенда юз фоизлик натижа!

Бир нечта гуруҳда ўтказилаётган мусобақанинг кучлилар жам бўлган А гуруҳида гроссмейстеримиз Жавоҳир Синдаров ҳам муваффақиятли одимлаяпти. Кеча ҳамюртимиз ўтказилган ҳар икки тур учрашувида ғалабага эришди. У 6-турда оқ доналарда польшалик Масье Клековскини мағлубиятга учратганди. Еттинчи турда эса қорада доналарда ўйнаганига қарамай, ҳиндистонлик гроссмейстер Арян Чопрадан устун келди. 

Саккизинчи тур олдидан Синдаров 5,5 очко билан 5-ўринга кўтарилиб олди. Тўртинчи поғонадан жой олган грузиялик Баадур Жобавада ҳам 5,5 очко бор. Етти учрашувнинг барчасида ғалаба қозонган норвегиялик Магнус Карлсен юз фоизлик кўрсаткич билан турнир жадвалида якка пешқадамлик қиляпти. Кучли учликни 6 очкодан жамғарган Рауф Мамедов ва Андрей Есипенко якунлаб берган.   

Бугун мусобақанинг 8-турида Жавоҳир Синдаров оқ доналарда ўзи сингари 5,5 очкога эга бўлиб турган германиялик Фредерик Сванга қарши баҳс олиб боради. Магнус Карлсен қора доналарда Рауф Мамедов билан ҳисоб-китоб қилади.  

Grenke Freestyle Chess Open мусобақасининг мукофот жамғармаси 225 000 еврони ташкил этади. Чемпион 60 000 евро билан бирга Лас-Вегасда ўтказиладиган Freestyle Chess турнирида қатнашиш ҳуқуқини қўлга киритади. Иккинчи ўрин соҳиби 40 000, учинчи ўрин эгаси 30 000 еврога эга бўлади. Топ-10`таликни якунлаб берган шахматчи 3000 еврога эга чиқади.