Грунт қироли Рафаэль Надални табриклаймиз!

Рафаэль Надаль Парера 1986 йил 3 июнь куни Испаниянинг Мальорка ороли Манакор шаҳрида дунёга келган. Грунт, яъни тупроқ қопламали кортлар қироли номини олган Надаль бугун 34 ёшга тўлди. Рафанинг отаси Себастьян икки укаси билан ресторан ҳамда ойна ишлаб чиқариз бизнеси билан шуғулланади. Онаси Ана Мария. Теннисчининг синглиси Мария Изабель.

Рафаэль теннис билан шуғулланишни амакаси Тонининг мураббийлигида 4 ёшидан бошлаган. Бу тандем 2019 йилга келибгина ҳамкорликни тўхтатади. Надаль профессионал фаолиятини 2001 йилда бошлаган ва шу кунгача 85 та турнирда бош мукофотни қўлга киритган. Фаолияти давомидаги иштирокидан $120,955,904 ишлаб олган (теннис тарихидаги учинчи кўрсаткич). 

Испаниялик афсона "Катта Дубулға" туркумига кирувчи 19 та турнирда бош совринга эга чиққан. Бу борадаги биринчи титули "Ролан Гаррос" бўлиб, 2005 йилда қўлга киритган. Илк бор 2008 йилнинг август ойида дунёнинг биринчи ракеткасига айланган. 

Надаль 35 та "Мастерс" турнирларида зафар қучган. Бу теннис тарихидаги рекорд натижа ҳисобланади. 2008 йилда Пекин Олимпиадасида чемпион бўлган. 2016 йилги Рио Олимпиадасининг жуфтлик баҳсларида ҳам олтин медаль билан тақдирланган.  

Испания терма жамоаси таркибида беш бор - 2004, 2008, 2009, 2011 ва 2019 йилларда норасмий жаҳон чемпионати ҳисобланган Дэвис Кубогини боши узра баланд кўтарган. Унинг номидаги академия 2015 йилнинг декабрида ташкил этилган бўлиб, она шаҳри Манакорда фаолият юритяпти. Надаль бўш вақтида гольф ва покер ўйнайди. Мадриднинг "Реал" клуби мухлиси. Турмуш ўртоғи Мария Франсиска "Хиска" Парельо билан 2005 йилда танишган. 2019 йилнинг октябрига келибгина улар расман никоҳдан ўтишган.